ހޯމަ 25 ޖޫން 2007
މާލޭގައި ހަމައެކަނި މަތީ ސާނަވީ ކިޔަވާދޭ ސަރުކާރު ސްކޫލްކަމަށްވާ ސެންޓަރ ފޯ ހަޔާ ސެކެންޑަރީ އެޑިއުކޭޝަން (ސީއެޗްއެސްއީ)ން މިއަދު ދަސްވެނިވި 300 އެއްހާ ދަރިވަރުންގެ ތެރެއިން ގިނަ ޢަދަދެއްގެ ދަރިވަރުން ދަރުބާރުގޭ ކުރިމަތީ ކުރި އިޙްތިޖާޖްގައި ސީއެޗްއެސްއީގެ ސުޕަވިޒަރ ނާހިދާ ސްކޫލުގައި ސަރުކާރުގެ ޕޮރޮޕެގަންޑާ ހިންގާފައިވާތީ މަޤާމުން އިސްތިފާދެއްވުމަށް ގޮވާލައިފިއެވެ.
އިސްތިޢުފާގެ އަޑު އުފުލަމުން، ނާހިދާއަކީ ސިޔާސީކުލަ ޖެހިފައިވާ ސަރުކާރުގެ ޕޮރޮޕެގަންޑާ ހިންގާ މެޝިނެއްކަމަށް ސީއެޗްއެސްއީގެ ދަރިވަރުން ގޮވަމުންދިޔައެވެ. އަދި ނާހިދާގެ އަނިޔާވެރިކަމުގެ ޝިކާރާގައި އެތައް ކުދިންނެއް ޖެހިފައިވާކަމަށާއި، އެގޮތުން އޭނާގެ ހަސަދާގައި ޖެހި އެތައް ކުދިންނެއްގެ ކިޔެވުން ހަލާކުވެފައިވާކަމަށް މި އިޙްތިޖާޖްގައި ބައިވެރި ކުދިން ގޮވަމުންދިޔައެވެ.
މި އިޙްތިޖާޖްތަކުގައި ބައިވެރިވި ކުދިން ތިބީ އެކުދިންގެ ޝުޢޫރު ފާޅުކުރުމުގެ ގޮތުން ބެނާތަކެއް ހިފައިގެންނެވެ. “ސީއެޗްއެސްއީގެ 18 މިލިއަން ބަޖެޓު ކޮބާ؟” އަދި “ކިޔަވާ ކުދިންނަށް ޤާބިލު ޓީޗަރުން ބޭނުން، ލައިބްރަރީގެ ހިދުމަތް ރަނގަޅުކުރޭ” އިޙަތިޖާޖް ކުރަމުންދިޔަ ކުދިން ގެންގުޅުނު ބެނާތަކުގައި ލިޔެފައިވެއެވެ. އަދި މީގެ އިތުރުން ސީއެޗްއެސްއީ އިސްލާހުކޮށް، މިވީ ދެ އަހަރުތެރޭގައި ދަރިވަރުންނަށް ކުރެވުނު ހިތި ތަޖުރިބާގެ ރަހަ، ސީއެޗްއެއްސީއަށް އަންނާން އޮތް ޖީލު ސަލާމަތް ކޮށްދެއްވުމަށް ގޮވަމުންދިޔައެވެ. “ލެބޯޓްރީގައި ކެމިކަލް ހަމަކޮށްދީ، އަންހެންކުދިންނަށް އުދަގޫ ނުކުރޭ” އަދި “އަޑު އައްސަވާ، ހަސަދަވެރި ތަފާތު ކުރުންތަކަށް ޖާގައެއްނެތް، ނާހިދާ އިސްތިޢުފާ” ޝުއޫރުފާޅު ކުރުމަށް އުފުލަމުންދިޔަ ބެނާތަކުގައި ލިޔެފައިވެއެވެ
No comments:
Post a Comment