ދަރިވަރުންގެ ޙައްޤުތަކަށް އަރައިގަތުން ހުއްޓާނުލައިފިނަމަ "ރިފޯމް ސީ.އެޗް.އެސް.އީ" އިން އިހުތިޖާޖު ކުރަން ނިކުންނާނެ

17 ޖުލައި 2008 (ބުރާސްފަތި)

ސީ.އެޗް.އެސް.އީ ގެ ދަރިވަރުންނަށް އިންޓަވަލްގަޑީގައި ސްކޫލުން ބޭރަށް ނުނިކުމެވޭ ގޮތަށް، ސްކޫލް ގޭޓް ބަންދުކޮށް، ސްކޫލް ތެރޭގައި ދަރިވަރުން ހައްޔަރުކޮށް، އެކުދީންގެ ޙައްޤުތަކަށް ސްކޫލް މެނޭޖްމަންޓުން އަރައިގަންނަމުންދާތީ، "ރިފޯމް ސީ.އެޗް.އެސް.އީ" ހަރަކާތުން، އެންމެ ހަރުކަށި ޢިބާރާތުން އެކަންކުށްވެރި ކުރަމެވެ.

އިންޓަވަލް ގަޑީގައި ސުކޫލް ތެރޭގައި ކުދިން ހިފެހެއްޓުމަކީ އެކުދިންނަށް ދެވޭ ވަރަށް ބޮޑު އަނިޔާއެކެވެ. ސްކޫލް ބޭރުން ލިބޭ އަގަށްވުރެ ސްކޫލްތެރޭގައި ހުންނަ ކެންޓީނުން ބައެއް އެއްޗިހި އަގު ބޮޑެވެ. ކުދިންގެ ތެރޭގައި ގިނައީ އަތޮޅުތަކުން މާލެ އައިސް ތިބިކުދިންނެވެ. ހުރިހާ ކުދިންނަކަށް ކެންޓީނުން އިންޓަވަލް ގަޑީގައި ކެއުމުގެ ތަނަވަސްކަމެއް ނެތެވެ. ތަކެތީގެ އަގު ބޮޑުވުމުގެ ސަބަބުން އިންޓަވަލް ކުރަން ގެއަށްދާން ބޭނުންވިޔަސް، ގެއަށް ނުދެވުމުގެ ސަބަބުން އެއްވެސް އެއްޗެއް ނުކައި ބަނޑަށް ތިބޭ ކުދިންވެސް މަދެއްނޫނެވެ. މީގެ އިތުރުންވެސް އެތައް ސަތޭކަ ކުދިންނަށް 15 މިނެޓް ތެރޭގައި، އެންމެ ދެ އިސްކުރުން ފެންބޮއި، ހައެއްކަ ފާޚާނާ ބޭނުން ކުރާނެ ގޮތެއް ނުވިސްނެއެވެ. މިއީ ވަރަށް ލާއިންސާނީ ޢަމަލެކެވެ. މިހުރިހާކަމެއްގެ ނަތީޖާއަކީ ސްކޫލަށް ދިއުމުގެ ބޭނުން ފުރިހަމަ ނުވުމެވެ. ބަނޑުހައި ހޫނު ކަމާއި، ހިތްހަމަ ނުޖެހުމާއި، ނަފްސާނީ އަނިޔާތަކެއްގެ ތެރޭގައި ރަނގަޅަކަށް ނުކިޔެވޭނެއެވެ.

މަގުމަތީގައި ނުވަތަ ކެފޭ ތަކުގައި މަދު ކުދިބަޔަކު ސަކަރާތް ގަތުމަކީ، ދެން ތިބި ހުރިހާ ކުދިންގެ ޙައްޤުތަކަށް ސްކޫލް މެނޭޖްމަންޓުން އަރައިގަންނަން އޮތް ބަހަނާއެއް ނޫނެވެ. އަދި މީގެ ކުރިން ސީއެޗް.އެސް.އީ އިން ތަޢުލީމު ހާސިލް ކޮށްފައިވާ ދަރިވަރުންނަށް ލިބިދީފައިވާ ޙައްޤެއް، މިހާރުގެ ދަރިވަރުންގެ ކިބައިން ނިގުޅައިގަތުމަކީވެސް އިންސާފެއްނޫނެވެ.

ސީ.އެޗް.އެސް.އީ ދަރިވަރުންނަށް އިންޓަވަލް ގަޑީގައި ސްކޫލުން ބޭރަށް ނިކުތުން މަނާކޮށް، ސްކޫލް މެނޭޖްމަންޓުން ހަރުކަށި ގަވާއިދެއް ހަދައިގެން އުޅުމަކީ، ވަރަށް ފިނޑި ޢަމަލެކެވެ. މީގެން ދޭހަވަނީ ދަރިވަރުންގެ އަޚްލާޤް ބައްޓަންކުރުމުގައި ސްކޫލް މެނޭޖްމަންޓް ފޭލް ވެފައިވާކަމެވެ. އޮބިއަޅުވައިގެން އެއްވެސް ކަމެއް ހައްލު ނުވާނެއެވެ.

ވުމާއެކު، އިންޓަވަލް ގަޑީގައި ސްކޫލުން ބޭރަށް ނުދެވޭ ގޮތަށް ދަރިވަރުންން އޮބިއެޅުވުމުގެ ހަރުކަށި ގަވާއިދު އުވާލައި، އިންޓަވަލްގަޑީގައި ސްކޫލްގެ ގޭޓުތައް ހުޅުވުމަށް، ސްކޫލްގެ މެނޭޖްމަންޓަށާއި ސްކޫލްގެ ފްރިންސިޕަލް ފާތުމަތު އާމިރާއަށް ގޮވާލަމެވެ. މިހަރުކަށި ގަވާއިދު އުވާނުލައިފިނަމަ ސީ.އެޗް.އެސް.އީ ކުދިންގެ ޙައްޤުގައި، "ރިފޯމް ސީ.އެޗް.އެސް.އީ" ހަރަކާތުން ވަރަށް ޘާބިތުކަމާއެކު އިހުތިޖާޖު ކުރަން ނިކުންނާނެ ކަމުގެ އިންޒާރުވެސް ހިއްސާކޮށްލަމެވެ.

އަދި ސީ.އެޗް.އެސް.އީގެ މެނޭޖްމަންޓުން އެސްކޫލްގެ ދަރިވަރުންނަށް ކުރަމުން މިދާ ގޯނާ ހުއްޓުވައި، މިކަން ބައްލަވައި، މިކަމާމެދު ފިޔަވަޅު އަޅުއްވައިދެއްވުމަށް އެޑިޔުކޭޝަން މިނިސްޓަރ ޒާހިޔާ ޒަރީރަށް އިލްތިމާސްކުރަމެވެ.